रुपेन्द्र पटेल, रौतहट, २२ फागुन । होली पर्व नजिकिएसँगै रौतहटका बजार अनुगमन नहुँदा आम उपभोक्ताहरु ठगिन बाध्य भएका छन् ।

जिल्लाको १८ वटै स्थानीय तहका बजार अनुगमन नहुँदा सर्बसाधारण ठगिन बाध्य भएका हुन् । जिल्लाको गौर, चन्द्रनिगाहपुर ,गरुडा, समनपुर, कटहरिया लगायतका बजारमा अनुगमन हुन नसकेको हो । हिन्दु धर्मालम्बीहरुको महान् चाड होली पर्व नजिकिएसँगै पर्वमा हरेक सरसामानको व्यापार बढ्ने गर्छ । यही मौका छोपेर व्यापारीहरूले अस्वाभाविक भाउ बढाउ“दा सर्वसाधारण उपभोक्ता मारमा परेका छन् । चाडबाडका बेला अस्वस्थकर मिसावट म्याद गुज्रेका सामानको समेत बिक्री हुने गरेको छ । तर बजार अनुगमनमा स्थानीय तहले समेत चासो देखाएको छैन । अहिले जिल्लाको प्रमुख व्यापारिक केन्द्रहरूमा होलीका लागि किनमेल गर्नेको भीडभाड बढेको छ ।

अनुगमन अभावमा बजार महँगो भएकाले सर्वसाधारण उपभोक्ता ठगिने क्रम बढेको उपभोक्ता हित संरक्षण मञ्च रौतहटका जिल्ला अध्यक्ष टिका घिमिरेको भनाइ रहेको छ । चाडपर्वका बेला प्रमुख बजारहरूमा उपभोक्ताको भीड बढेको छ, यस वर्ष बजार अनुगमन नभएकाले उपभोक्ताहरू ठगिनु परेको गुनासो बढेको उनले बताएका छन् ।

उपभोक्ता ठगीमा परिरहँदा स्थानीय प्रशासन र स्थानीय तह मौन बसेको छ । बजार अनुगमनको जिम्मा पाएका स्थानीय प्रशासन र स्थानीय तहले बजार अनुगमनलाई नियमित र प्रभावकारी बनाउन नसकेको गुनासो रौतहटमा उतिकै छन । जसको फाइदा कालोबजारी गर्ने व्यापारीले उठाइरहेका छन् । अधिकांश पसलहरूमा म्याद नाघेका सामान बिक्री भइरहेको छ । होली पर्व नजिकिँदै गर्दा व्यापारीले यस्ता सामान बिक्री गरेका हुन् । राष्ट्रिय महत्वका मुख्य चाडपर्व नजिकिँदै गर्दा बजारमा अखाद्य र मिति सकिएका सामान बिक्री भएको भन्ने आम उपभोक्ताको गुनासो छ ।