काठमाडौं । हुंकार मधेशले संगठनलाई व्यवस्थित र प्रभावकारी बनाउने उद्देश्यसहित पहिलो चरणमा २१ वटा विभागका प्रमुखहरूको जिम्मेवारी तोकेको छ। संगठनले विभागीय प्रमुखहरूलाई सात दिनभित्र कार्ययोजना, कार्यविधि र सयदिने कार्यक्रमको कार्यसूचीको खाका तयार गरी पेस गर्न निर्देशन दिएको छ।

हुंकार मधेशले जारी गरेको जानकारीअनुसार, विभागीय प्रमुखका लागि कम्तीमा स्नातक उत्तीर्ण र सम्बन्धित विषयमा विज्ञता हासिल गरेको हुनुपर्ने प्रावधान राखिएको थियो। सोही मापदण्डअनुसार योग्य व्यक्तिहरूलाई विभिन्न विभागको जिम्मेवारी प्रदान गरिएको संगठनले जनाएको छ।

संगठनले दशैंलगत्तै झापादेखि कञ्चनपुरसम्म सयदिने हुलाकी यात्रा सुरु गर्ने कार्यक्रमसमेत तय गरेको छ। उक्त यात्रामार्फत संगठन विस्तार, जनसम्पर्क तथा आफ्नो उद्देश्य र एजेन्डालाई जनस्तरसम्म पुर्‍याउने योजना रहेको जनाइएको छ।

हुंकार मधेशको औपचारिक घोषणा २०८३ असोज ९ गते गरिएको थियो। घोषणापछि संगठनात्मक संरचना निर्माण र विभागीय जिम्मेवारी बाँडफाँटलाई प्राथमिकता दिँदै संगठनले आगामी कार्यक्रमको तयारी अघि बढाएको हो।

हुंकार मधेशले तोकेका २१ विभागीय प्रमुखहरूमा संवाद तथा समन्वय विभागमा रामकुमार कश्यप, प्रचारप्रसार तथा प्रकाशन विभागमा केशवकुमार, संगठन विभागमा कौशलेन्द्र कौशल, कानुन तथा न्याय विभागमा रत्नेश्वर सनातनी र आईटी तथा कार्यमूल्यांकन विभागमा रोशनकुमार रहेका छन्।

त्यस्तै, बौद्धिक तथा पेशाकर्मी विभागको जिम्मेवारी डा. एन.एन. भारद्वाज, आर्थिक विभागको सचिदानन्द यादव, अनुशासन विभागको राजाराम यादव तथा प्रशिक्षण तथा नीति अनुसन्धान विभागको जिम्मेवारी मनोहर मानवलाई दिइएको छ।

सहकारी, कर्पोरेट तथा उद्यमशीलता विभागमा कृष्णकुमार, स्वयंसेवी सुरक्षा दस्ता विभागमा उमेश सिंह, युवा तथा विद्यार्थी विभागमा पंकज आनन्द र वैदेशिक रोजगार विभागमा मनिषकुमारलाई प्रमुखको जिम्मेवारी तोकिएको छ।

यसैगरी, सूचना तथा सञ्चार विभागमा पुष्पा प्रिया, संघीय मामिला विभागमा मधुमाया यादव, शिक्षा तथा संस्कृति विभागमा इन्द्रजित साफी तथा उद्योग, व्यापार, वाणिज्य तथा व्यवसाय विभागमा सन्दीप त्रिपाठीलाई जिम्मेवारी दिइएको छ।

नागरिकता तथा भूमिहीन समस्या समाधान विभागको प्रमुखमा अंगद यादव, कृषि विकास तथा अनुसन्धान विभागमा रामकिशुन नायक, विज्ञान तथा प्रविधि विभागमा प्रो. विजय महासेठ र सहिद तथा घाइते व्यवस्थापन विभागमा मो. युसुफ साफी नियुक्त भएका छन्।

विभागीय प्रमुखहरूलाई तोकिएको समयभित्र कार्ययोजना र कार्यक्रमको खाका पेस गर्न निर्देशन दिइएसँगै हुंकार मधेशले आगामी दिनमा संगठन विस्तार र जनस्तरमा आफ्नो उपस्थिति बलियो बनाउने तयारी गरेको छ। दशैंपछि सुरु गर्ने भनिएको सयदिने हुलाकी यात्रालाई संगठनको आगामी कार्यक्रमको प्रमुख अभियानका रूपमा अघि सारिएको छ।